Sigrún Sævarsdóttir-Griffiths, hljómsveitarstjóri.

24. maí 2022

Nýr sjónvarpsþáttur um skapandi tónlistarmiðlun

„Ég sé þig“, nýr sjónvarpsþáttur eftir Önnu Hildi Hildibrandsdóttur um skapandi tónlistarmiðlun Sigrúnar Sævarsdóttur-Griffiths, verður frumsýndur á RÚV næstkomandi sunnudag.

Í þættinum er sagt frá því hvernig Sigrún nýtir tónlist til að hjálpa fólki til virkni í samfélaginu. Sigrún hefur stofnað fjölda hljómsveita víða um heim með jaðarsettum einstaklingum. Markmiðið er að fólk tilheyri hljómsveit og taki þátt í að búa til frumsamda tónlist.

Fylgst er með stofnun Kordu Samfóníu sem er 35 manna hljómsveit á Íslandi og samanstendur af fólki sem hefur leitað sér hjálpar hjá starfsendurhæfingarstöðvum, spilurum úr Sinfóníuhljómsveit Íslands og nemendum og starfsfólki við skapandi tónlistarmiðlun í Listaháskóla Íslands.

Einnig er rætt við þrjá meðlimi Kordu Samfóníu um þýðingu verkefnisins fyrir þau og hvernig það hjálpaði þeim að vinna sig í gegnum sín áföll. 

Að mati Sigrúnar er tónlist svo miklu meira en eitthvað til þess að hafa gaman af. Tónlistarkiðkun breyti lífi fólks. „Allir ættu að fá tækifæri til þess að tengjast og eflast með þessum hætti,“ bendir þessi merki hljómsveitarstjóri á.

Anna Hildur kynntist Sigrúnu í London árið 2017 og heillaðist að sögn algjörlega af því hvernig hún nýtti skapandi tónlistarmiðlun í vinnu sinni með heimilislausum. „Ég var því ekki í neinum vafa um að mig langaði að finna flöt á að segja frá söguna um stofnun Korda Samfóníu á Íslandi og varpa ljósi á mikilvægi þess starfs sem Sigrún leiðir,” segir Anna Hildur

Framleiðandi „Ég sé þig“ er Glimrandi. Þátturinn er framleiddur fyrir RÚV og styrktur af Endurgreiðslusjóði fyrir kvikmyndir, Miðstöð símenntunnar á Suðurnesjum/Samvinnu, Lýðheilsusjóði, Starfsendurhæfing Hafnarfjarðar, Starfsendurhæfingu Vesturlands, Tónlistarborginni Reykjavík og VIRK.

Þátturinn er framleiddur af Glimrandi fyrir RÚV og styrktur af Endurgreiðslusjóði fyrir kvikmyndir, Miðstöð símenntunnar á Suðurnesjum/Samvinnu, Lýðheilsusjóði, Starfsendurhæfing Hafnarfjarðar, Starfsendurhæfingu Vesturlands, Tónlistarborginni Reykjavík og VIRK.

Til baka