Ágrip af sögu skólastarfs á Bifröst
Háskólinn á Bifröst á rætur sínar að rekja til Samvinnuskólans sem var stofnaður í Reykjavík árið 1918. Í ágúst það ár samþykkti stjórn Sambands íslenskra samvinnufélaga að stofna skóla fyrir starfsfólk samvinnuhreyfingarinnar. Kennsla hófst í desember sama ár, en skólasetningu seinkaði vegna spænsku veikinnar sem þá geisaði í Reykjavík.
Fyrsti skólastjóri skólans var Jónas Jónsson frá Hriflu, sem mótaði starfsemi hans meðal annars með hliðsjón af Ruskin College í Oxford þar sem hann hafði sjálfur stundað nám.
Árið 1955 var skólinn fluttur að Bifröst í Norðurárdal í Borgarfirði. Samhliða flutningnum tók sr. Guðmundur Sveinsson við sem skólastjóri af Jónasi Jónssyni og skólinn var endurskipulagður sem heimavistarskóli. Á næstu áratugum byggðist upp samfélag á Bifröst þar sem bæði námsaðstaða og íbúðarhúsnæði voru þróuð.
Byggingar háskólans standa á landi sem áður tilheyrði jörðinni Hreðavatni. Upphaflega var landið leigt af eigendum jarðarinnar, en árið 1985 gáfu erfingjar Sigurlaugar Daníelsdóttur og Kristjáns Gestssonar lóðina skólanum til eignar til minningar um foreldra sína. Tveimur árum síðar var reistur minningarskjöldur um þau við heimreið gamla skólahússins.
Samvinnuskólinn þróaðist í takt við breytingar á íslensku samfélagi og háskólastigi. Nafn skólans hefur tekið breytingum í gegnum tíðina og hann hefur starfað undir heitunum Samvinnuskólinn, Samvinnuháskólinn, Viðskiptaháskólinn á Bifröst og Háskólinn á Bifröst. Fram til ársins 1990 var skólinn deild innan Sambands íslenskra samvinnufélaga, en frá því ári hefur hann verið sjálfseignarstofnun.
Kennslan þróaðist frá því að vera nokkurra mánaða nám yfir í fullt háskólanám. Skólinn hóf kennslu á meistarastigi árið 2003 og hefur síðan boðið bæði grunn- og framhaldsnám.
Í dag býður Háskólinn á Bifröst upp á háskólanám á sviði viðskipta, lögfræði og félagsvísinda. Einnig eru starfrækt Háskólagátt og Endurmenntun sem bjóða undirbúningsnám og símenntun fyrir ólíka markhópa.
Starfsemi háskólans er skipulögð sem sveigjanlegt fjarnám. Háskólinn er með skrifstofur í Reykjavík og Hvanneyri. Kennsla fer að mestu fram á netinu með reglulegum staðlotum og námskeiðum eftir því sem við á.