Umsókn Háskólagátt

Háskólinn á Bifröst byrjaði haustið 2014 að kenna allt nám í lotubundinn kennslu. Þá fá allir nemendur fyrirlestra á rafrænu formi og sækja verkefnatíma í stað hefðbundinna fyrirlestra. Þetta nýja fyrirkomulag felur í sér að námsgreinar verða kenndar í 6 vikna lotum með prófum í 7. viku en þó verða einstök námskeið kennd yfir tvær lotur. 

Aukin gæði

Með því að kenna í lotubundinn kennslu verður auðveldara fyrir nemendur að einbeita sér að þeim námskeiðum sem þeir taka hverju sinni og álag á nemendur verður jafnara yfir kennslutímabilið. Þetta gefur kennurum og nemendum aukið svigrúm til að staldra við flókin viðfangsefni, allt eftir þörfum nemenda hverju sinni. Einnig verður stuðst við ákveðna kennslufræði sem ber nafnið Learning by developing og þá sérstaklega í misserisverkefnum á sumarönn. Lotubundin kennsla skapar aukin tækifæri til að fá fagaðila víðsvegar úr heiminum til að kenna hluta úr eða heila námsgrein við háskólann. Þá er lagt upp úr góðum fríum milli námstarna sem hjálpar nemendum að hafa skýrari skil milli náms og fjölskyldulífs. 

Rafrænir fyrirlestrar og verkefnatímar

Kennarar leggja inn  rafræna fyrirlestra tvisvar í viku til að miðla kennsluefni til nemenda. Nemendur á Bifröst fá þannig tækifæri til að lesa og fara yfir innlagnarefnið tímanlega til að undirbúa sig fyrir verkefna- og umræðutíma með kennara. Staðnemar mæta í verkefnatíma í miðri viku en fjarnemar mæta á vinnuhelgar.  Gert er ráð fyrir að nemendur taki virkan þátt í samræðum í verkefna- og umræðutímum og vinni að verkefnum sem kennari leggur fyrir hverju sinni. 

Raunverkefni

Bifröst mun halda áfram að leggja áherslu á verkefnavinnu meðal nemenda og að tengja þau við raunverkefni samfélagsins. Enn betur verður hlúð að verkefnavinnunni með því að kenna nemendum verkefnastjórnun og veita þeim viðeigandi handleiðslu en þó án þess að taka ábyrgðina af nemendunum sem þurfa á endanum að skila skýrslu og verja verkefni sín á hátíðlegum misserisvörnum.

Aukin áhersla á gagnrýna hugsun

Aðferðafræðin sem beitt verður við verkefnavinnu mun byggja á aðferðafræði sem við köllum "learning by developing". Þetta er aðferðafræði sem er til þess fallin að auka færni nemenda í að takast á við flókin viðfangsefni, bætir verkstjórn í hópastarfi og ýtir undir gagnrýna hugsun meðal nemenda.

Velkomin í nýtt og betra kennslufyrirkomulag

Háskólinn á Bifröst býður nemendur hjartanlega velkomna í nýtt kennslufyrirkomulag sem mun bæta innihald námsins, kennslu og umræður um efnið sem og verkefnavinnu.

Mikil og góð reynsla

Háskólinn á Bifröst hefur áralanga reynslu í háskólakennslu í fjarnámi bæði í grunn- og í meistaranámi. Skipulag fjarnámsins er með þeim hætti að fyrirlestrar og kennsluefni í hverju námskeiði er aðgengilegt nemendum á fjarnámsvef háskólans. Nemendur geta þannig skipulagt tíma sinn eins og þeim hentar best. Í hverju námskeiði er vinnuhelgi þar sem nemendur hittast ásamt kennara á Bifröst. Hver kennslulota er í 7 vikur með einni vinnuhelgi á Bifröst. Á vinnuhelgum fá nemendur gistingu á staðnum en öll aðstaða og aðbúnaður nemenda er til fyrirmyndar. Fjarnámsloturnar eru kenndar á tímabilinu september til maí.

Vinnuhelgar á Bifröst

Í öllum námskeiðum liggja fyrir ákveðin þekkingar-, leikni- og hæfnimarkmið. Í hverri viku leggur kennari fram tvo fjarfyrirlestra og í fyrirlestrunum fjallar hann um þekkingarmarkmið námskeiðsins, kynnir verkefni vikunnar og fjallar um efni vikunnar. Lögð eru fyrir verkefni jafnt og þétt sem þjálfa nemendur í að öðlast þá leikni og hæfni sem að er stefnt í hverju námskeiði fyrir sig. Á vinnuhelgum fer síðan fram verkefnavinna og umræður með kennara. Gert er ráð fyrir talsverðri verkefnavinnu í hverju námskeiði og lögð er áhersla á hópa- og teymisvinnu í verkefnum.

Stöðugt verkefnaálag

Rík áhersla er lögð á að nemendur geti annars vegar unnið sjálfstætt að úrlausn krefjandi verkefna og hins vegar unnið í hópi samnemenda að rannsóknum og úrlausn stærri verkefna. Mikil áhersla er lögð á gagnrýna hugsun og hagnýta tengingu við raunhæf verkefni sem eru fjölbreytt og umfangsmikil. Fjölbreytt viðfangsefni, umræður og samstarf nemenda og kennara m.a á vinnuhelgum á Bifröst tryggir nemendum góðan undirbúning fyrir ábyrgðar- og forystustörf.