Rannsóknir og útgáfa á félagsvísindasviði

Rannsóknir í félagsvísindum við Háskólann á Bifröst eru í höndum öflugs og fjölbreytts hóps rannsakenda. Þær spanna breitt svið, allt frá áfallastjórnun og menningarstjórnun til skapandi greina, stjórnmála og stjórnmálasálfræði, kynjajafnréttis og rannsókna á upplýsingaóreiðu og popúlisma, svo dæmi séu tekin.

Við kennslu og rannsóknir á fræðasviðum deildarinnar starfa doktorarnir dr. Ásthildur Elva Bernharðsdóttir, dr. Bergsveinn Þórsson (starfandi forseti félagsvísindadeildar), dr. Eiríkur Bergmann, dr. Magnús Árni Skjöld Magnússon, dr. Njörður Sigurjónsson og dr. Sigrún Lilja Einarsdóttir.

Félagsvísindadeild Háskólans á Bifröst tók þátt í IN SITU, umfangsmiklu evrópsku rannsóknarverkefni á sviði menningar og skapandi greina í dreifbýli, sem lauk í júní 2026. Verkefnisstjóri af hálfu Háskólans á Bifröst var Erna Kaaber og verkefnið leiddi Anna Hildur Hildibrandsdóttir, fagstjóri skapandi greina.

Anna Hildur kom á fót diplómu- og grunnnámslínum í skapandi greinum við félagsvísindadeild Háskólans á Bifröst árið 2021 og hefur síðan leitt brautryðjandi starf í samstarfi við aðrar mennta- og rannsóknastofnanir á sviði skapandi greina.

Rannsóknasetur skapandi greina var stofnað haustið 2023 og er vistað við Háskólann á Bifröst. Framkvæmdastjóri þess er Erla Rún Guðmundsdóttir. Setrið er í eigu Háskólans á Bifröst, Háskólans á Akureyri, Listaháskóla Íslands, Háskólans á Hólum og Háskóla Íslands. Háskólinn á Bifröst heldur utan um starfsemi setursins, sem er fjármögnuð með framlögum frá menningar- og viðskiptaráðuneytinu og háskóla-, iðnaðar- og nýsköpunarráðuneytinu.