Sigurður Ingi Jóhannsson, innviðaráðherra og Margrét Jónsdóttir Njarðvík, rektor Háskólans á Bifröst, undirrituðu 10. janúar 2023 samning um stofnun rannsóknaseturs í byggða- og sveitarstjórnarmálum. Með samningnum styður ráðuneytið við uppbyggingu og rekstur setursins.
Markmið rannsóknasetursins er að efla jákvæða byggðaþróun og styrkja sveitarstjórnarstigið á Íslandi með markvissum rannsóknum sem stuðla að hlutlægri og faglegri umræðu og leiða til betri stefnumótunar og ákvarðanatöku, jafnframt að efla nám og fræðslu um byggða- og sveitarstjórnarmál. Starfsemi rannsóknaseturins er þegar orðin umtalsverð enda þótt stutt sé enn liðið frá stofnun þess.
Dr. Vífill Karlsson, prófessor, leiðir rannsóknastarfið en að daglegri stjórnun þess kemur Stefán V. Kalmannsson.
Nánari upplýsingar um starfsemi rannsóknasetursins veitir dr. Vífill Karlsson.