Námskrá inniheldur upplýsingar um skipulag náms, kennsluaðferðir og námskeiðslýsingar ásamt lýsingu á þeirri þekkingu, leikni og hæfni sem nemendur eiga að búa yfir að námi loknu.
MLM Umsókn MS Umsókn MS-MLM í forystu og stjórnun
Meistaranám í forystu og stjórnun við Háskólann á Bifröst er 90 ECTS eininga nám sem hægt er að ljúka með MS gráðu og einnig MLM gráðu.
MS gráða er 90 eininga meistaranám þar sem nemendur ljúka 10 námskeiðum (60 ECTS einingar) og MS ritgerð (30 ECTS einingar).
MLM gráða er 90 eininga viðbótarnám á meistarastigi án lokaritgerðar. Nemendur ljúka 15 námskeiðum (90 ECTS einingar).
Meistaranám í forystu og stjórnun er fjölmennasta námsbrautin við Háskólann á Bifröst. Við undirbúning og hönnun námsins var framkvæmd þarfagreining á því sem námið þyrfti að innihalda til að það yrði sem gagnlegast og þannig tengd saman fræði og praktík. Meistaranám í forystu og stjórnun er fjölbreytt og krefjandi nám sem ætlað er að búa nemendur undir forystu- og stjórnunarstörf. Námið á að gefa nemendum hagnýta þekkingu á viðfangsefninu og dýpka fræðilegan skilning og grunn. Námið undirstrikar og styður við hlutverk Háskólans á Bifröst sem er m.a. að undirbúa fólk fyrir forystustörf í atvinnulífi og samfélagi, með sjónarmið sjálfbærni og samfélagslegrar ábyrgðar að leiðarljósi.
Boðið er upp á tvær nýjar leiðir í forystu og stjórnun. Nemendur geta annars vegar valið um forystu og stjórnun með áherslu á mannauðsstjórnun og hins vegar um forystu og stjórnun með áherslu á verkefnastjórnun.
- MS-MLM í forystu og stjórnun með áherslu á mannauðsstjórnun
- MS-MLM í forystu og stjórnun með áherslu á verkefnastjórnun
- MS-MLM í forystu og stjórnun með áherslu á þjónandi forystu
Forysta er margþætt hugtak sem þarf að skoða út frá mörgum sjónarhornum. Til að ná því markmiði eru fjölbreytt námskeið í boði sem mynda bæði fræðilegan og hagnýtan grunn. Sérstakt námskeið í þjónandi forystu, (e. servant leadership), er önnur undirstaða námsins en innan þess eru einnig kennd námskeið þar sem fjallað er um margar ólíkar kenningar innan leiðtogafræðanna. Auk þess er sérstök áhersla lögð á samskipti og samskiptahæfni í náminu.
„Tilgangur námsins fer vel saman við gildi Bifrastar um að mennta sjálfstæða og ábyrga leiðtoga,“ segir Sigurður Ragnarsson forseti viðskiptadeildar. Sigurður hefur áralanga reynslu af að vinna með hugtakið forysta bæði í kennslu sem og stjórnenda- og leiðtogaþjálfun í fyrirtækjum þar sem hann segist hafa fundið mikinn áhuga á hugtakinu. Augljós þörf hafi því verið fyrir slíkt nám sem þjóni kalli markaðar, atvinnulífs og samfélags.. Þá felst styrkleiki í því hve ólík sjónarmið mætast í náminu en þar má finna einstaklinga með fjölbreyttan bakgrunn. Fólk lærir því mikið af hvort öðru og tengslanetið er verðmætt en allt á þetta fólk sammerkt að ætla að nýta sér námið á sínu sviði til að ná betri árangi og efla sig og styrkja,“ segir Sigurður.
Þjónandi forysta
Þjónandi forysta (e. servant leadership) er ein af akademísku undirstöðum námsins og er praktísk hugmyndafræði sem rammar inn heildstæða og árangursríka forystu. Í þjónandi forystu er mikil áhersla lögð á heiðarleg samskipti og gott siðferði. Innan hennar eiga allir starfsmenn að geta blómstrað og haft áhrif og rúm er fyrir ólík sjónarmið og skoðanir.
„Fjarnámið hentar mér mjög vel og með því að fá fyrirlestra í gegnum netið get ég skipulagt tíma minn betur. Þá eru verkefnin mjög hagnýt og notuð raunveruleg dæmi sem tengjast vel inn í atvinnulífið.“
- Sigurbjörg Hjálmarsdóttir,
MS í forystu og stjórnun 2017
Námið er kennt í fjarnámi en Háskólinn á Bifröst hefur áralanga reynslu í háskólakennslu í fjarnámi bæði í grunnnámi og í meistaranámi. Skipulag fjarnámsins er þannig að fyrirlestrar og kennsluefni í hverju námskeiði er aðgengilegt nemendum á fjarnámsvef háskólans og nemendur geta þannig skipulagt tíma sinn eins og þeim hentar best. Í hverju námskeiði er vinnuhelgi þar sem nemendur hittast ásamt kennara á Bifröst. Nemendur fá gistingu á staðnum en öll aðstaða og aðbúnaður nemenda er til fyrirmyndar. Fjarnámsloturnar eru kenndar á tímabilinu september til maí. Námið hefst með vinnulotu í lok ágúst á Bifröst til að efla tengsl nemenda og kennara og kynna námskeiðin vel fyrir nemendum og þau verkefni sem eru framundan.
Fjarnám – september til maí
Hvert námskeið í fjarnámi er allajafna kennt í 7 vikna lotum (tvö námskeið eru kennd yfir tvær lotur) og í hverju námskeiði er ein vinnuhelgi á Bifröst. Í öllum námskeiðum liggja fyrir ákveðin þekkingar-, leikni- og hæfnimarkmið. Í hverri viku birtir kennari fjarfyrirlestra þar sem m.a. er fjallað um efni vikunnar og verkefni eru kynnt og útskýrð. Lögð eru fyrir verkefni jafnt og þétt sem þjálfa nemendur í að öðlast þá leikni og hæfni sem að er stefnt í hverju námskeiði fyrir sig. Á vinnuhelgum fer síðan fram verkefnavinna og umræður með kennara. Gert er ráð fyrir talsverðri verkefnavinnu í hverju námskeiði og lögð er áhersla á hópa- og teymisvinnu í verkefnum.
Inntökuskilyrði
Inntökuskilyrði í meistaranám í viðskiptafræði er grunnnámsgráða á háskólastigi eða menntun sem telja má sambærilega við grunngráðu í háskóla. Leitað er að fjölbreyttum hópi umsækjenda með mismunandi menntun og starfsreynslu. Sú dýrmæta reynsla sem nemendur öðlast af því að læra og vinna með fjölbreyttum hópi nemenda með mismunandi bakgrunn er ómetanleg. Nemendahópurinn á það sameiginlegt að vilja öðlast framúrskarandi þekkingu, þjálfun og undirbúning fyrir stjórnunarstörf nútímans.
Umsóknarfrestur er 20. maí fyrir haustönn og 10. desember fyrir vorönn.
Námskrá MS/MLM í forystu og stjórnum