28. ágúst 2026

Ný heimildarmynd IN SITU

Ný heimildarmynd, IN SITU: Culture in the Making, Innovation at the Edge, hefur verið gefin út sem hluti af evrópska rannsóknarverkefninu IN SITU, sem Háskólinn á Bifröst tekur þátt í. Tvær íslenskar tilviksrannsóknir koma við sögu í myndinni, sem var unnin með þátttöku rannsakenda og fólks í þeim samfélögum sem rannsóknin náði til.

Horfa á heimildarmyndina IN SITU: Culture in the Making, Innovation at the Edge

Myndin var þróuð í samstarfi rannsakenda og þátttakenda í tilviksrannsóknum IN SITU. Þátttakendur lögðu sjálfir til myndefni og frásagnir og höfðu þannig áhrif á hvernig reynsla þeirra, starf og nærumhverfi birtast í myndinni.

Þessi nálgun er hluti af þátttökumiðaðri rannsóknaraðferð IN SITU, þar sem samfélög og staðbundnir aðilar taka virkan þátt í að skapa þá þekkingu og frásögn sem verður til í rannsókninni.

Þjálfun í stafrænni frásagnargerð

Sérstaða framleiðslunnar fólst meðal annars í því að þátttakendur og rannsakendur fengu þjálfun í snjallsímakvikmyndagerð og stafrænni frásögn.

Breska fyrirtækið Pocket Stories hélt tvö fjögurra klukkustunda námskeið þar sem farið var yfir kvikmyndatöku, einfalda klippingu, skipulag og miðlun efnis. Markmiðið var annars vegar að tryggja fjölbreytt og staðbundið myndefni fyrir heimildarmyndina og hins vegar að efla færni þátttakenda í sjónrænni frásögn og miðlun til framtíðar.

Tvær íslenskar tilviksrannsóknir

Tvær íslenskar tilviksrannsóknir koma fram í myndinni.

Jólasveinarnir úr Dölum, á vegum Kruss ehf., tengja saman staðbundinn menningararf, ferðaþjónustu, matvælaframleiðslu, handverk og sögu Dalanna.

CREATRIX RÝMI–X, á vegum Creatrix ehf., er vettvangur fyrir skapandi starf, samtal og nýsköpun ungs fólks á Vesturlandi.

Meðal íslenskra þátttakenda sem segja frá í myndinni eru Signý Óskarsdóttir, Þorgrímur Einar Guðbjartsson og Erna Kaaber, sem jafnframt leiddi rannsóknarteymi Háskólans á Bifröst í verkefninu.

Þekking frá Bifröst nýtt við framleiðsluna

Anna Hildur Hildibrandsdóttir, lektor og fagstjóri skapandi greina við Háskólann á Bifröst, sat í alþjóðlegum heimildarmyndahópi verkefnisins og tók þátt í að móta aðferðafræði og framleiðsluferli myndarinnar.

„Markmiðið var að nýta þá þekkingu sem við höfum byggt upp í námskeiðinu Stafræn frásagnargerð, sem boðið er upp á sem valfag við Háskólann á Bifröst,“ segir Anna Hildur.

Að hennar sögn gerði nálgunin kleift að efla færni þátttakenda í stafrænni miðlun og jafnframt vinna innan þess fjármagns sem var til ráðstöfunar við gerð myndarinnar.

Heimildarmyndin er þannig ekki aðeins leið til að miðla niðurstöðum verkefnisins heldur einnig hluti af rannsóknaraðferð þess. Í henni fléttast saman þátttökukvikmyndagerð, staðbundin þekking og sameiginleg frásagnarsköpun.

Um IN SITU

Háskólinn á Bifröst var einn samstarfsaðila IN SITU á Íslandi. Verkefninu var stýrt af Centre for Social Studies (CES) við Háskólann í Coimbra í Portúgal og það styrkt af Horizon Europe, rannsóknar- og nýsköpunaráætlun Evrópusambandsins, samkvæmt styrksamningi nr. 101061747.

Til baka