Misserisverkefni á Bifröst: Nemendur kynntu nýsköpun og rannsóknir

Misserisdagur Háskólans á Bifröst var haldinn hátíðlegur í Borgarnesi. Þar komu saman rúmlega 200 nemendur úr öllum deildum skólans til að kynna afrakstur misserisverkefna, sem í daglegu tali eru kölluð Missó.

Missó eru fastur liður við háskólann. Nemendur vinna í fjögurra til sex manna teymum í samstarfi við leiðbeinendur og fagaðila af vinnumarkaði. Viðfangsefnin snúa að rannsóknum að eigin vali með áherslu á nýsköpun, sjálfbærni, verðmætasköpun og samkeppnishæfi. Missó er hagnýt þjálfun í verkefnastjórnun og undirbúningur undir lokaritgerðir á háskólastigi.

Niðurstöðurnar voru kynntar með ólíkum hætti eftir námskeiðum og deildum. Í greiningu og gagnalæsi settu nemendur upp veggspjöld þar sem unnið var með töluleg gögn og kynntu niðurstöður sínar út frá þeim.

Í stofnun fyrirtækja og grænni nýsköpun fluttu alls 18 nemendahópar fjárfestakynningar þar sem hver hópur fékk 10 mínútur til framsögu og 8 mínútur til að svara spurningum dómnefndarinnar.

Í félagsvísindadeild þreyttu nemendur svo hefðbundnar misserisvarnir samkvæmt eldra fyrirkomulagi deildarinnar. Deginum lauk með lokahófi á Hótel Vesturlandi þar sem boðið var upp á veitingar og úrslit tilkynnt í hverjum flokki fyrir sig. Í félagsvísindadeild sigraði hópur C með verkefnið „Hvatar og hindranir í þátttöku ungmenna í menningarviðburðum með hliðsjón af Barnamenningarhátíð Suðurlands“. Hópinn skipuðu Andri Snær Ársælsson, Aníta Daðadóttir, Árný Leifsdóttir, Theodóra Sveinsdóttir og Vilhjálmur Magnússon. Í umsögn leiðbeinanda kom fram að verkefnið væri afmarkað og hefði skýrt hagnýtt gildi fyrir skipuleggjendur barnamenningarviðburða á landsbyggðinni, auk þess sem vinnan bar vitni um samstarf innan hópsins.

Í greiningu og gagnalæsi bar sigur úr býtum hópur 29 með verkefnið „Skiptir flokkurinn máli? Munur á tíðni banvænnar lögregluvaldbeitingar 2013–2023“, sem unnið var af Andra Má Magnússyni og Knúti Ingólfssyni. Val dómnefndar stóð á milli nokkurra verkefna en þessi hópur hlaut vinninginn fyrir úrvinnslu gagna og framsetningu á nýrri þekkingu á skýran og skipulegan máta.

Í námskeiðinu Stofnun fyrirtækja og græn nýsköpun hlaut hópur 12 efsta sætið fyrir verkefnið „Partýplanið“. Hópinn skipuðu Bjarni Gíslason, Helga Ingvarsdóttir, Karen Jacobsen, Lea Steinþórsdóttir, Selma Klara Gunnarsdóttir og Árdís Árnadóttir. Dómnefndina skipuðu Jón Snorri Snorrason, Ragnheiður H. Magnúsdóttir, Kristinn Már Reynisson og Sirrý, og fékk hópurinn hæstu einkunnina fyrir að fylgja öllum umbeðnum þáttum verkefnisins á skýran hátt, ásamt samstilltum flutningi og svörum í kynningunni.

Til baka