Metaðsókn í meistaranám við Háskólann á Bifröst 16. maí 2017

Metaðsókn í meistaranám við Háskólann á Bifröst

Metaðsókn er í meistaranám í Háskólann á Bifröst fyrir næsta haust. En umsóknir í meistaranámið voru um 75% fleiri en á sama tíma á síðasta ári. Formlegum umsóknafresti lauk 15. maí en umsóknir eru áfram að berast skólanum og farið verður yfir þær allar. 

„Nýjungar í meistaranáminu hafa fengið mjög góðar viðtökur en markaðsfræði og forysta og stjórnun með áherslu á mannauðsstjórnun eru nú í boði í fyrsta sinn í viðskiptadeild og viðskiptalögfræði á meistarastigi er ennfremur á sínu fyrsta ári. Ágæt aðsókn er einnig að öðru námi á meistarastigi, meistaranámi í alþjóðaviðskiptum, forystu og stjórnun og í menningarstjórnun,“ segir Vilhjálmur Egilsson, rektor Háskólans á Bifröst.

Gera má ráð fyrir því að vel á annað hundrað meistaranema hefji nám við Háskólann á Bifröst í haust og verði langstærsti hópurinn sem hafið hefur meistaranám á Bifröst. Háskólinn á Bifröst hefur verið í góðri sókn síðustu árin og voru tæplega 600 nemendur skráðir til náms við háskólann á síðustu haustönn. Nemendafjöldinn hefur farið vaxandi við Háskólann á Bifröst og á það við á öllum skólastigum, símenntun, Háskólagátt, grunn- og meistaranámi. 

Allar nánari upplýsingar má nálgast á heimasíðu Háskólans á Bifröst hér.