Grein dr. Ólínu Kjerúlf birt í Journal of American Folklore

Ný fræðigrein eftir dr. Ólínu Kjerúlf Þorvarðardóttur, rektor Háskólans á Bifröst, hefur verið birt í hinu gamalgróna þjóðfræðiriti Journal of American Folklore. Greinin ber heitið „Burning Questions. Icelandic Witch Trials 1625–1719“ og fjallar um íslensku galdramálin á tímabilinu 1625–1719 í þjóðfræðilegu og lögfræðilegu samhengi.

Journal of American Folklore er rótgróið alþjóðlegt fræðirit á sviði þjóðfræði og er gefið út af University of Illinois Press. Birting greinarinnar færir rannsóknir Ólínu á íslensku galdraofsóknunum inn í alþjóðlega fræðilega umræðu um galdrafárið sem gekk yfir Evrópu á 16. og 17. öld.

Í greininni skoðar Ólína galdraofsóknir á Íslandi á tímabilinu 1625–1719 og setur þær í samhengi við þá umfangsmiklu atburðarás sem kennd hefur verið við galdrafárið í Evrópu. Rannsóknin nálgast íslensku galdramálin bæði út frá þjóðfræðilegum heimildum og lögfræðilegum gögnum og varpar þannig ljósi á samspil galdratrúar, munnmæla, samfélags og réttarframkvæmdar.

Greinin byggir á doktorsrannsókn Ólínu, Brennuöldin. Galdur og galdratrú í málskjölum og munnmælum, frá árinu 2000. Þar rannsakaði hún íslensku galdramálin meðal annars með samanburði málsskjala og munnmæla og setti atburðina hér á landi í stærra sögulegt og menningarlegt samhengi.

Galdramálin sem risu hér á landi voru angi af mun stærri og geigvænlegri evrópskri atburðarás sem síðar hefur verið nefnd galdrafárið í Evrópu. Með greininni varpar Ólína nýju ljósi á íslensku galdramálin og setur þau í víðara evrópskt samhengi fyrir alþjóðlegan lesendahóp.

Greinin „Burning Questions. Icelandic Witch Trials 1625–1719“ er aðgengileg í Journal of American Folklore hjá University of Illinois Press.

Hér má nálgast greinina.

Til baka