Ágúst Einarsson hlýtur heiðursdoktorsnafnbót

Dr. rer. pol. Ágúst Einarsson, prófessor emeritus og fyrrum rektor Háskólans á Bifröst, hefur hlotið heiðursdoktorsnafnbót Viðskiptafræðideildar Háskóla Íslands fyrir framúrskarandi framlag sitt til viðskiptafræða, rannsókna og samfélagsumræðu á Íslandi.

Ágúst lauk doktorsprófi í rekstrarhagfræði frá Háskólanum í Hamborg. Hann átti langan og farsælan ferli sem prófessor við Háskóla Íslands, áður en hann varð prófessor og rektor við Háskólann á Bifröst. Rannsóknir hans og kennsla hafa einkum beinst að rekstrarhagfræði, menningarhagfræði, sjávarútvegsfræðum og skapandi greinum. Hann hefur meðal annars rannsakað skipulag smásöluverslunar og hagræn áhrif menningar í alþjóðlegu samhengi.

Ágúst hefur ritað yfir 30 bækur á íslensku og ensku með sérstaka áherslu á fræðamál á sviði viðskiptafræða, auk verka er snúa að menningu og listum.  Hann hefur jafnframt gegnt fjölmörgum trúnaðarstörfum í íslensku samfélagi, stjórnmálum og atvinnulífi.

Eins og kemur fram á vef Háskóla Íslands hefur Ágúst Einarsson með ritstörfum sínum og virku framlagi til samfélagsins haft varanleg áhrif á þróun viðskiptafræða og tengsl háskólasamfélagsins við atvinnulíf og íslenskt samfélag.  

Háskólinn á Bifröst óskar Ágústi innilega til hamingju með heiðursnafnbótina.

Til baka