Dr. Magnús Skjöld flytur erindi á upphafsviðburði Jean Monnet Chair ISARCEUR-verkefnisins við Háskólann á Bifröst.

Upphafsviðburður Jean Monnet Chair

Þann 15. janúar 2026 fór fram upphafsviðburður (Kick-off) Jean Monnet Chair-tímabils við Háskólann á Bifröst. Þetta umfangsmikla verkefni ber yfirskriftina Iceland’s strategic role in Arctic and European security, skammstafað ISARCEUR. Viðburðurinn markaði formlegt upphaf nýs rannsóknar- og fræðsluátaks á sviði Evrópufræða sem nær yfir þriggja ára tímabil.

Verkefnið er leitt af dr. Magnúsi Árna Skjöld Magnússyni, prófessor við félagsvísindadeild Háskólans á Bifröst, og nýtur stuðnings Evrópusambandsins í gegnum Erasmus+ áætlunina.

Helstu áherslur verkefnisins eru:

• Að þróa ný námskeið í grunnnámi við Háskólann á Bifröst með áherslu á öryggis- og varnarmál Evrópu, norðurslóða og hlutverk Íslands í því samhengi.
• Að efla rannsóknir á evrópskri öryggisstefnu og nýjum öryggisógnum á norðurslóðum og í íslensku samhengi.
• Að skapa vettvang fyrir stefnumótandi umræðu milli fræðasamfélags, opinberra aðila, fjölmiðla og almennings í tengslum við framtíðarsamskipti Íslands og bandamanna þess í Evrópu og annarsstaðar.
• Að styrkja tengsl við alþjóðlega samstarfsaðila, m.a. sendiráð, rannsóknarstofnanir, Jean Monnet netverk og evrópska háskóla og rannsakendur sem vinna að skyldum málefnum. 

Í upphafi viðburðarins steig prófessor Magnús Árni Skjöld í pontu og sagði frá verkefninu, því næst hélt dr. Margrét Njarðvík rektor háskólans stutt ávarp og Clara Ganslandt sendiherra ESB á Íslandi, lokaði svo dagskránni með ræðu. Viðburðurinn skapaði vettvang fyrir tengslamyndun og spjall.

Mæting var góð, sem undirstrikar vilja til aukins samstarfs og samstöðu meðal nágrannaþjóðanna. Auk fræðimanna og starfsmanna Háskólans á Bifröst voru á meðal gesta sendiherrar og fulltrúar sendiráða Svíþjóðar, Danmerkur, Grænlands, Finnlands, Frakklands, Póllands og Kanada á Íslandi.

Vefsíða verkefnisins er aðgengileg á íslensku og ensku

Til baka