Verðlaunin voru nú afhent í níunda sinn, en þau hljóta fyrirtæki sem þykja skara fram úr í fræðslu- og menntamálum. Er þetta jafnframt í annað sinn sem Samkaup hlýtur þessi verðlaun.

Í rökstuðningi dómnefndar segir m.a. að ljóst sé að Samkaup leggi mikinn metnað í vera eftirsóknarverður vinnustaður með markvissri uppbyggingu starfsfólks þar sem lögð er áhersla á tækifæri þess til að eflast og þroskast bæði persónulega og í starfi. Mjög jákvætt sé að sjá þá áherslu sem lögð er á fjölbreyttar menntaleiðir innan fyrirtækisins sem ná til breiðs hóps starfsfólks sem einnig miðlar þekkingunni á milli vinnustöðva innan fyrirtækisins.

Forysta til framtíðar er 12 ECTS eininga námslína við viðskiptadeild Háskólans á Bifröst sem starfsfólki Samkaupa stendur til boða að taka. Námslínan er afrakstur af samstarfi háskólans og Samkaupa og geta nemendur að námi loknu fengið einingarnar metnar til grunnnáms í viðskiptafræði.