Nýr alþjóðafulltrúi á Bifröst

Þorbjörg Valdís Kristjánsdóttir hefur verið ráðin sem alþjóðafulltrúi skólans. Hún útskrifaðist með B.Sc. í líffræði árið 2006 frá Háskóla Íslands og hefur síðan þá unnið fjölbreytt störf sem tengjast alþjóðamálum á einn eða annan hátt. Hún hefur m.a. stýrt fræðsludeild Fjölskyldu-og húsdýragarðins í Reykjavík, starfað með Free Willy/Keiko samtökunum á Íslandi og í Noregi við umönnun háhyrningsins Keikó, starfað sem verkefnastjóri á alþjóðasviði  Rannís og svo síðar alþjóðafulltrúi Landbúnaðarháskóla Íslands þar sem hún tók þátt í fjölda alþjóðlegra verkefna. Síðustu misseri starfaði hún sem leiðbeinandi og umsjónarkennari við Grunnskóla Borgarfjarðar á Varmalandi  og stundaði samhliða meistaranám við Háskólann á Akureyri, í kennsluréttindum meðfram vinnu. Þorbjörg Valdís er borin og barnfædd í Borgarfirðinum, nánar tiltekið í Laxholti í Borgarbyggð og er nú búsett í Litla-Laxholti. 

Hlutverk alþjóðafulltrúa er meðal annars að veita nemendum upplýsingar um skiptinám og starfsþjálfun erlendis og umsjón með erlendum skiptinemum við skólann. Auk þess veitir Þorbjörg starfsfólki ráðgjöf vegna endurmenntunar erlendis.

Til baka