Hnattvæðing og hið borgaralega samfélag

Félagsvísindadeild stefnir að því að bjóða nýtt námskeið í haust, fáist nægur nemendafjöldi. Námskeiðið er ætlað þeim sem vilja tileinka sér þjálfun í gagnrýninni hugsun til að greina og ræða flókin þjóðfélags- og stjórnmálafyrirbæri.

Námskeiðið ber titilinn Hnattvæðing og hið borgaralega samfélag (Globalization and Civil Society) og er kennt á ensku. Skoðað verður hvaða áhrif aukin hnattvæðing hefur haft á stjórnkerfi, samfélagsviðmið og þróun grasrótahreyfinga. Ljósi verður varpað á flókin tengsl milli hnattvæðingar og samfélagsþróunar, einkum hvað varðar hnattvæðingarferlið sjálft og málefni flóttafólks á heimsvísu. Fjallað verður um flóttamannakrísuna svokölluðu, staðbundin grasrótarviðbrögð (Ísland og Grikklandseyjar), Brexit, uppgang Vox á Spáni, aukinn Trumpisma og viðbrögð Miðjarðarhafsþjóða við vaxandi flóttamannastraumi.

Námskeiðið veitir 6 ECTS einingar á grunnnámsstigi.

Gerð er krafa um stúdentspróf eða sambærileg menntun, t.d. úr Háskólagátt Háskólans á Bifröst.

Þátttökugjald er kr. 75.000 kr. 

Vakin er athygli á því að mörg stéttarfélög greiða hluta námskeiðsgjalda fyrir sína félagsmenn.

Kennari námskeiðsins er dr. George Kalpadakis, virtur grískur sagnfræðingur sem gegnir stöðu aðalrannsakanda við Akademíuna í Aþenu. Kalpadakis hefur komið víða við og m.a. starfað sem gestaprófessor við Háskólann í Cambridge, Harvard-háskóla og Vínarháskóla.

Auk rannsóknarstarfa og kennslu við stjórnmálafræði- og lagadeildir grískra háskóla, starfar Kalpadakis sem sérstakur ráðgjafi innan Sameinuðu þjóðanna um lýðræðislegt og réttlátt alþjóðlegt skipulag. Hann hefur jafnframt gegnt ráðgjafastöðum fyrir grísku ríkisstjórnina, Evrópuráðið og Öryggis- og samvinnustofnun Evrópu. Sérsvið Kalpadakis nær yfir átakalausnir, svæðasamvinnu, stofnanauppbyggingu og reglusetningar í stjórnsýslu. Kalpadakis hefur gefið út nokkrar fræðibækur og fjölda greina.

Hér má finna nánari upplýsingar um námskeiðið.

Til baka