Margrét Jónsdóttir Njarðvík ásamt Sævari Kristinssyni, forseta Rotary Reykjavík Miðborg, á fundi klúbbsins í gær.

Háskólinn á Bifröst rokkar

Margrét Jónsdóttir Njarðvík, rektor Háskólans á Bifröst, var boðið af félögum í Rotary miðborg að segja frá þeim viðsnúningi sem orðið hefur hjá háskólanum á undanförnum fjórum árum, en rekstur hans hafði fram að því verið þungur eða allt frá hruni árið 2008. 

Erindi sitt nefndi Margrét „Háskólinn á Bifröst rokkar“ og er óhætt að segja að sú yfirskrift kjarni ágætlega þann góða takt sem náðst hefur í starfseminni allt frá því að  háskólinn stóðst með láði gæðaúttekt í desember 2022, en um það leyti sem hún tók við sem rektor árið 2020 lá fyrir, að vinna þyrfti markvisst að umbótum í háskólastarfinu eftir forskrift gæðakerfis háskóla.

Margrét játaði jafnframt að það hafi komið sér ánægjulega á óvart þegar henni barst nú nýlega bréf frá Creditinfo þess efnis, að Háskólinn á Bifröst hefði verið valinn eitt af fyrirmyndar fyrirtækjum ársins, en einungis 2% íslenskra fyrirtækja uppfylla að jafnaði þau skilyrði sem þarf til að komast í þennan eftirsóknarverða flokk. 

Þetta einstaka ferðlag, sem hefur fleytt Háskólanum á Bifröst upp í flokk framúrskarandi háskóla, þakkar Margrét fyrst og fremst frábærum starfsmannahópi. „Til að komast heilu og höldnu á áfangastað, skiptir öllu máli að hafa starfsfólk um borð, sem er reiðbúið að taka höndum saman og vinna samhent að þeim árangri sem stefnt er að.“

Til baka