Samtal um skapandi greinar á Bifröst, Brynja Þóra Guðnadóttir, hönnuður.

Getum við hannað byggingar okkar þannig að þær verði hluti af vistkerfinu?

Laugardaginn 4. september nk. heldur hönnuðurinn Brynja Þóra Guðnadóttir fyrirlestur við Háskólann á Bifröst um frumkvöðlaverkefni sem hún stendur að í sjálfbærum arkitektúr, heilsusamlegum efnum og nýsköpun á sviði byggingarlistar. Fyrirlesturinn verður sendur út í opnu streymi kl. 12:30 – 13:30.  

Í fyrirlestrinum verður m.a. fjallað um hugmyndafræði sjálfbærs arkitektúrs og notkun náttúrulegra lausna í húsahönnun. Brynja hannar um þessar mundir byggingu á vistvænu húsi á lóð í Þingvallasveit. Ferlið verður um leið bæði tilraun og rannsókn á sjálfbærum arkitektúr í framkvæmd.

Hringrásarhugsun í húsahönnun verður gerð sérstök skil, hvernig vatn er endurunnið og þjappaður jarðvegur úr nærumhverfi nýttur sem aðalbyggingarefni og einnig hvernig orkuþörf í húshitun lágmörkuð, svo að dæmi sé tekin.

Þá verður vikið að heilsusamlegum byggingarefnum og í hve miklum mæli hættuleg efni eru notuð í húsgögn og innréttingar. Einnig mun Brynja koma inn á þá nýsköpun og miklu gerjun sem er að eiga sér stað á meðal hönnuða hjér á landi í sjálfbærri byggingarlist.

Fyrirlesturinn er liður í samtali um skapandi greinar á vegum Háskólans á Bifröst  og verður í opnu streymi á FB síðu skólans. Fyrirlesturinn verður haldinn í Aðalbóli á Bifröst. Nemendur og kennarar á Bifröst eru velkomnir á meðan húsrúm og sóttvarnarreglur leyfa.  

Til baka