Þak yfir höfuðið

Hagkvæm leiga

Einstaklingar fá herbergi í 2-6 manna íbúðum en einnig bjóðast fjölskylduíbúðir af öllum stærðum og gerðum. 

Allir íbúar háskólaþorpsins á Bifröst hafa aðgang að margvíslegri aðstöðu og þjónustu. 

Í skólanum er bjart og fallegt bókasafn og á staðnum er líkamsræktarstöð og heitir pottar. 

Með búsetu á Bifröst fylgir aðgangur að háhraða interneti.

Stutt í alla skóla

Leikskólinn Hraunborg

Leikskólinn er rekinn af Hjallastefnunni.  Hjallastefnan hefur notið vaxandi virðingar og velgengni undanfarin ár og meðal annars hlotið viðurkenningar fyrir áherslu á jafnréttisuppeldi. Allar nánari upplýsingar má finna á vef Hraunborgar.

Nýir íbúar á Bifröst þurfa að sækja um leikskólavist fyrir börn sín.

Umsóknareyðublöð er að finna á vef Hraunborgar og þeim má skila með rafrænum hætti. Nánari upplýsingar er að finna á vef Hraunborgar.

Grunnskólinn á Varmalandi

Varmaland er lítill þéttbýliskjarni í um það bil tíu mínútna akstursfjarlægð frá Bifröst. Skólabíll ekur börnunum í skólann og heim. Mjög gott íþróttahús og sundlaug eru við skólann. Nemendur á Varmalandi sem stunda tónlistarnám við Tónlistarskóla Borgarfjarðar sækja tónlistartíma sína í tengslum við skólann. Nýir íbúar á Bifröst þurfa að sækja um skólavist fyrir börn sín. Nánari upplýsingar er að finna á vef Varmalandsskóla.

Líkamsrækt

Í húsnæði skólans eru þreksalur og líkamsræktarstöðin Jakaból, gufubað, nuddpottur og vaðlaug. Svæðið er opið alla daga frá klukkan 06:00 á morgnana til 23:00 á kvöldin.

 

 

Einstök náttúra

Háskólinn á Bifröst er staðsettur í Norðurárdal í Borgarfirði, um 100 km frá Reykjavík. Eldstöðin Grábrók, Hreðavatn, Jafnaskarðsskógur, Paradísarlaut, Norðurá og fossinn Glanni eru í næsta nágrenni og yfir landinu trónir Baula, eitt tignarlegasta fjall landsins. Þetta fallega umhverfi býður upp á ótal möguleika til gönguferða og útivistar.

Bifröst stendur á landsvæði sem áður tilheyrði jörðinni Hreðavatni. Hinn 30. desember 1985 á þrítugasta afmæli skólastarfs á Bifröst, færðu erfingjar Hreðavatnshjónanna Sigurlaugar Daníelsdóttur og Kristjáns Gestssonar skólanum höfðinglega gjöf er þeir afhentu honum lóðina sem hann stendur á til eignar í minningu hjónanna.

Svipmyndir