Rannsóknastefna
Háskólinn á Bifröst leggur metnað sinn í að rækta öfluga rannsóknamenningu og efla innviði sína með markvissum hætti. Slík uppbygging er undirstaða akademískra gæða og samfélagslegs ávinnings háskólans. Með þverfaglega fræðimennsku að leiðarljósi er litið á hágæða rannsóknir sem lykil að nýsköpun þekkingar og forsendu öflugs háskólastarfs sem mætir áskorunum samtímans, hvort tveggja á innlendum og alþjóðlegum vettvangi. Rannsóknastarf háskólans styður jafnframt með beinum hætti við innleiðingu heimsmarkmiða Sameinuðu þjóðanna um sjálfbæra þróun.
Háskólinn á Bifröst leggur metnað sinn í að uppfylla kröfur sem gerðar eru til alþjóðlegra rannsóknaháskóla. Það felur í sér virka þátttöku í alþjóðlegu samstarfi, eflingu þverfaglegra rannsókna og skýra umgjörð um starfsþróun rannsakenda, þar sem traustar kröfur um vísindaleg heilindi og gæði eru hafðar að leiðarljósi. Stefna þessi skilgreinir þær grundvallarreglur, skipulag og ábyrgð sem háskólinn fylgir í öllu rannsóknastarfi.
1. Stjórnun rannsókna og ábyrgð
Rannsóknastefna háskólans er mótuð í samráði við akademískt starfsfólk. Framkvæmd hennar er í höndum framkvæmdastjórnar, einkum rannsóknastjóra, deildarforseta, gæðastjóra og rektors.
Rannsóknastjóri ber ábyrgð á umsjón með rannsóknaþjónustu, rannsóknasamstarfi og söfnun og viðhaldi gagna varðandi rannsóknarstarfsemi og árangur háskólans.
Rannsóknastjóri og fjármálastjóri hafa eftirlit með fjárhagslegri stjórnun rannsóknafjár.
Fræðasviðin (deildirnar), undir forystu deildarforseta, fylgja eftir rannsóknum sínum í samræmi við meginreglur um heilindi, siðfræði og akademískt frelsi, byggt á rannsóknastefnu háskólans og deildanna.
Rannsóknasetur háskólans lúta stjórn forstöðumanns hvers seturs, sem ber ábyrgð á að starfsemi setursins sé í samræmi við reglur og stefnur háskólans.
Akademískt starfsfólk, rannsóknastjóri, deildarforsetar og rektor bera ábyrgð á að tryggja að rannsóknir háskólans séu gerðar í samræmi við siðareglur háskólans og viðurkennda staðla um rannsóknasiðfræði.
2. Akademískt rannsóknastarfsfólk
Háskólinn á Bifröst veitir akademísku starfsfólki úthlutaðan tíma til að helga rannsóknum. Skipting starfsskyldna milli rannsókna og kennslu er ákvörðuð í samráði við deildarforseta við gerð árlegrar starfsáætlunar, en hlutfall rannsókna getur aukist samhliða öflun utanaðkomandi rannsóknastyrkja.
Deildarforsetar móta, í samvinnu við rannsóknastjóra og mannauðsstjóra, umgjörð um starfsþróun og framgang í starfi. Þar er meðal annars kveðið á um stuðning við nýja rannsakendur, rannsóknamisseri og stuðning við doktorsnám. Rannsóknaþjónusta háskólans sér um upplýsingagjöf og námskeiðahald er varðar vísindastarf og rannsóknatengd málefni.
Háskólinn leggur áherslu á þverfaglega samvinnu starfsmanna og þátttöku í innlendum sem erlendum rannsóknatengslanetum. Hvatt er til hágæða alþjóðlegs samstarfs. Reynt akademískt starfsfólk er hvatt til að efla leiðtoga- og leiðbeiningahæfni sína, meðal annars með því að leiðbeina framhaldsnemum og stýra umfangsmiklum rannsóknarverkefnum.
3. Heilindi og siðfræði í rannsóknum
Allar rannsóknir á vegum Háskólans á Bifröst skulu samræmast meginreglum um vandaða vísindahætti og rannsóknasiðfræði, eins og kveðið er á um í siðareglum háskólans. Rannsóknir skulu gerðar af heilindum, faglegri nákvæmni og ábyrgð, í hvívetna í samræmi við viðurkennda vísindalega starfshætti.
Rannsakendum ber að virða sjálfsákvörðunarrétt og hag þátttakenda og tryggja öryggi þeirra og velferð. Í öllu rannsóknarstarfi skal gætt fyllsta heiðarleika, hlutleysis og sanngirni.
4. Mat á árangri í rannsóknum
Háskólinn á Bifröst á aðild að matskerfi opinberra háskóla. Akademísku starfsfólki ber að skila árlegri skýrslu um rannsóknaafurðir sínar sem metnar eru til rannsóknastiga í samræmi við reglur kerfisins. Niðurstaða rannsóknastiga er lögð til grundvallar í árlegum viðræðum um skiptingu starfsskyldna og rannsóknatíma, auk þess sem hún vegur þungt við mat á framgangi í starfi.
5. Rannsóknir og kennsla
Háskólinn á Bifröst leggur áherslu á að efla rannsóknahæfni stúdenta og glæða áhuga þeirra á vísindastarfi. Markmið háskólans er að ýta undir forvitni og beita kennsluaðferðum sem styrkja færni nemenda í sjálfstæðum vinnubrögðum, gagnrýninni hugsun, nýsköpun og þróun.
Hvatt er til rannsóknatengdrar kennslu þar sem akademískt starfsfólk miðlar nýjustu þekkingu og rannsóknaniðurstöðum til stúdenta innan sinna fræðasviða.
Háskólinn styður dyggilega við meistaranema í lokaverkefnum þeirra og leitast við að bjóða þeim þátttöku í rannsóknarverkefnum háskólans. Jafnframt er stefnt að því að greiða leið stúdenta inn í doktorsnám í samstarfi við samstarfsskóla í Evrópska háskólabandalaginu OpenEU.
6. Samstarf, samstarfsaðilar og alþjóðavæðing
Háskólinn á Bifröst leggur ríka áherslu á að efla rannsóknasamstarf við aðra háskóla, atvinnulíf og félagasamtök. Samfélagsleg virkni er hornsteinn í starfsemi háskólans og er starfsfólk hvatt til að tengja rannsóknir sínar við hvers kyns áskoranir samtímans, hvort sem þær eru efnahagslegar, pólitískar, umhverfismál eða félagslegar.
Háskólinn starfar út frá þeirri sýn að alþjóðlegt samstarf efli og dýpki innlent samstarf. Því er rannsakendum veittur ríkur stuðningur til virkrar þátttöku í alþjóðlegum verkefnum, rannsóknatengslanetum og öðru samstarfi á alþjóðavettvangi.
7. Fjármögnun og umsýsla styrkja
Ytri fjármögnun er forsenda öflugs alþjóðlegs rannsóknasamstarfs og tækifæra fyrir nýja rannsakendur til að láta að sér kveða. Háskólinn á Bifröst hvetur akademískt starfsfólk sitt til öflunar styrkja frá innlendum og erlendum sjóðum, atvinnulífi og opinberum stofnunum.
Rannsóknaþjónusta háskólans veitir starfsfólki stuðning við gerð styrkumsókna. Rannsóknastjóri og deildarforsetar bera ábyrgð á að umsóknir séu í samræmi við reglur og stefnumörkun háskólans. Rannsóknaþjónusta og fjármálasvið annast fjárhagslega umsýslu styrkja í samstarfi við styrkþega, þar með talið bókhald, uppgjör og endurskoðun.
Háskólinn fjármagnar rannsóknir jafnframt með eigin rannsóknasjóði. Sjóðurinn úthlutar verkefnastyrkjum tvisvar á ári og veitir ráðstefnustyrki samkvæmt opnu kalli. Þá standa prófessorum til boða sértækir rannsóknareikningar og háskólinn styður við rannsóknamisseri starfsmanna.
8. Opin vísindi og gagnastjórnun
Háskólinn styður við birtingu rannsóknaafurða í opnum aðgangi (Open Access) í samræmi við stefnu háskólans þar um. Bókasafn háskólans og rannsóknaþjónusta hafa umsjón með innleiðingu þeirrar stefnu.
Rannsóknaþjónusta veitir aðstoð við gerð gagnastjórnunaráætlana og ráðgjöf um örugga varðveislu gagna. Lögð er áhersla á að rannsóknagögn fylgi FAIR-meginreglunum, þannig að þau séu finnanleg, aðgengileg, samtengjanleg og endurnýtanleg.
9. Útgáfa og miðlun
Akademísku starfsfólki ber að birta rannsóknaniðurstöður sínar á ritrýndum vettvangi á vegum viðurkenndra útgefenda sem uppfylla ítrustu gæðakröfur. Bókasafn háskólans sér til þess að vísindastarf háskólans sé aðgengilegt í opnum aðgangi, að svo miklu leyti sem höfundarréttur og aðrar aðstæður leyfa.
Háskólinn leggur ríka áherslu á samfélagsþátttöku og hvetur því starfsfólk til að taka þátt í opinberri umræðu á grundvelli sérþekkingar sinnar. Markaðs- og samskiptastjóri veitir starfsfólki stuðning við kynningu rannsókna og samskipti við fjölmiðla.
Við hvers kyns útgáfu rannsókna skal ávallt geta tengsla við Háskólann á Bifröst (affiliation) og vísa til þeirra sjóða sem styrktu verkefnið. Starfsfólki ber að virða alþjóðleg viðmið um höfundarhlutverk og fylgja góðum vísindasiðum við tilvísanir til annarra þátttakenda. Þá er hvatt til þess að rannsakendur tengi verkefni sín við heimsmarkmið Sameinuðu þjóðanna í rannsóknatillögum og við miðlun niðurstaðna.
Háskólinn hvetur rannsakendur til að vísa skýrt í viðeigandi heimsmarkmið Sameinuðu þjóðanna í rannsóknatillögum, hönnun verkefna og miðlun þar sem það á við.
Stefna þessi skal endurskoðuð eftir þörfum, en að minnsta kosti á fjögurra ára fresti af framkvæmdastjórn í samráði við akademískt starfsfólk.
Yfirfarið á fundi í Háskólaráði 20. ágúst 2026
Staðfest af rektor 16. júní 2026
Staðfest af Kennslu- og rannsóknaráði 11. Júní 2026
Gildir frá 20. ágúst 2026