Velkomin til starfa

Gréta Bergrún Jóhannesdóttir hefur verið ráðin sérfræðingur við Rannsóknasetur byggða- og sveitarstjórnarmála við Háskólann á Bifröst.

Gréta Bergrún lauk doktorsgráðu í félagsfræði frá Háskólanum á Akureyri í júní síðastliðnum og fjallaði doktorsverkefnið hennar um félagslegt taumhald slúðurs og áhrif þess á búferlaflutninga og ungar konur.  Þá lauk hún BA gráðu sinni í fjölmiðlafræði einnig við Háskólann á Akureyri en  meistaragráðu í kynjafræði við háskólann í Lundi í Svíþjóð.

Gréta Bergrún hefur víðtæka þekkingu og reynslu af sérfræðistörfum á sviði byggða- og sveitarstjórnarmála, m.a. sem sérfræðingur á rannsóknarsviði hjá Þekkingarneti Þingeyinga, en þar sinnti hún um langt árabil byggðarannsóknum, evrópuverkefnum, og verkefnum fyrir sveitarfélög er sneru að atvinnu- og nýsköpun. Þá hefur hún sinnt kennslu og rannsóknum við Háskólann á Akureyri síðastliðin fimm ár.

Gréta Bergrún er fædd og uppalin í Þistilfirði. Hún býr og starfar á Þórshöfn á Langanesi með vinnuaðstöðu í Kistunni, atvinnu- og nýsköpunarsetri, en sérfræðingsstarfið við rannsóknasetrið er án staðsetningar. Hún tekur nú við sérfræðingsstarfinu af dr. Bjarka Þór Grönfeldt, sem hvarf í vor sem leið til annarra starfa hjá félags- og vinnumarkaðsráðuneytinu og eru honum þökkuð vel unnin störf hjá rannsóknsóknasetrinu.

Við bjóðum Grétu Bergrúnu velkomna til starfa. 

Til baka