Þjálfun til árangurs - ifempower ryður kvenfrumkvöðlum braut

Háskólinn á Bifröst hefur verið aðili að Evrópuverkefninu ifempower - Interactive and mentorship based FEMale emPOWERment in the field of entrepreneurship. 

Verkefnið beinist að stöðu ungra kvenna sem frumkvöðlar og hefur vakið verðskuldaða athygli fyrir í senn markvissar og nýstárlegar aðgerðir þeim til stuðnings og eflingar í nýskapandi atvinnurekstri.

Þessu þriggja ára verkefni var hrundið af stað í sumarlok árið 2018 og lauk í ágúst síðastliðnum. Á meðal athyglisverðra afurða þess má nefna þróun nýrrar verkfærakistu ásamt kennslu- og stuðningsefni fyrir unga kvenfrumkvöðla, auk einstakrar mentor-áætlunar, sem hinir níu aðilar ifempower verkefnisins standa í sameiningu að.

Kári Joensen, lektor og Jón Snorri Snorrason, dósent, hafa stýrt ifempower hér á landi að hálfu Háskólans á Bifröst. 

Að sögn Kára hefur verið einstaklega ánægjulegt að taka þátt í verkefninu, ekki hvað síst fyrir þann athyglisverða árangur eða afurðir sem verkefnið hefur skilað og sagt er nánar frá á vef verkefnisins.

„Námskeiðið Konur fara í rekstur, sem þjálfar frumkvöðlafærni, er eitt af mörgum afurðum verkefnisins hér á landi. Það er nú valnámskeið í grunnnámi við Bifröst og hefur mælst vel fyrir," segir Kári.

Allar afurðir verkefnisins eru aðgengilegar fyrir mennta- og fræðslustarf sem  Open Education Resources (OER).

Ábendingar til stjórnvalda vegna aðgerða í þágu kvenfrumkvöðla sem verkefnastjórnin mælist til, eru birtar í Lokaskýrslu imfempower (Final ifempower Study).

Trained for Success: Empowering Future Women Entrepreneurs across Europe
Achievements of the ifempower project
Press Release

Til baka