Nýr lektor og mannauðsstjóri tekinn til starfa

Arney Einarsdóttir hefur hafið störf sem lektor við viðskiptadeild Háskólans Bifröst auk þess sem hún gegnir stöðu mannauðsstjóra skólans. Arney lauk doktorsprófi í mannauðsstjórnun frá Háskóla Íslands árið 2018. Hún starfaði sem lektor við viðskiptadeild Háskólans í Reykjavík frá árinu 2004 til 2017 og sem forstöðumaður rannsóknarstofnunar í mannauðsstjórnun. Frá 2018 starfaði Arney sem lektor við viðskiptafræðideild Háskóla Íslands.

Arney hefur auk þess verið gestakennari við Árhúsarháskóla, Simon Fraser háskóla í Vancouver og Kýpurháskóla. Hún hefur stýrt þátttöku Íslands í alþjóðlegu rannsóknarsamstarfi um 40 háskóla í CRANET samstarfsnetinu frá árinu 2005. Tilgangur þess er að standa fyrir reglubundnum rannsóknum á mannauðsstjórnun í öllum aðildarlöndunum til að auka þekkingu á þróun mannauðsstjórnunar í heiminum og gera samanburðarrannsóknir mögulegar. Arney er einnig virkur þátttakandi í tveimur öðrum alþjóðlegum rannsóknarverkefnum, annars vegar rannsókn á störfum stjórnenda, hjúkrunarfræðina og verkfræðinga í alls 47 þátttökulöndum (Work Design Across Cultures) og hins vegar í norrænu rannsóknarverkefni sem ber yfirskriftina "Future of Work" og er styrkt af Norrænu ráðherranefndinni. Arney hefur samhliða kennslu og rannsóknum tekið að sér ýmis verkefni sem ráðgjafi í rannsóknum og ráðningum fyrir fyrirtæki, stofnanir og félagasamtök hér á landi.

Til baka