Ný rannsókn í samstarfi við Listaháskóla Íslands

Byggjum brýr með samstarfi: MetamorPhonics sem nálgun á samfélagstengdu tónlistarverkefni, nefnist stórt rannsóknaverkefni sem Háskólinn á Bifröst vinnur nú að í samstarfi við Listaháskóla Íslands.

Rannsóknina leiðir Þorbjörg Daphne Hall, prófessor í tónlistardeild LHÍ, en verkefnið hlaut nú nýverið 63 m.kr. verkefnastyrk úr Rannsóknasjóði Vísinda- og tæknisjóðs. Meðumsækjandi að verkefninu er Anna Hildur Hildibrandsdóttir, lektor við Háskólann á Bifröst og fagstjóri skapandi greina. Þá situr Njörður Sigurjónsson, prófessor og fagstjóri í menningarstjórnun, jafnframt í ráðgjafaráði verkefnisins.  

Í útdrætti umsóknar er verkefninu lýst svo: „Til eru margvísleg samfélagsmiðuð tónlistarverkefni þar sem unnið er með fjölbreyttum hópum og samfélögum, t.d. einstaklingum í haldi eða skjólstæðingum heilbrigðisstofnana, einstaklinga á ólíkum aldri, með fjöllbreytta kunnáttu og bakgrunn. Þessi verkefni endurspegla þá hugmyndafræði að tónlist og tónlistariðkun geti haft jákvæð áhrif á fólk og jafnvel breytt lífi þess til hins betra. Meginmarkmið þessa verkefnis eru að rannsaka MetamorPhonics (MP) sem er dæmi um samfélagsmiðað tónlistarverkefni. Tilgangurinn er að skilja margvíslega þætti MP, meðal annars bakgrunn og áhugahvöt þátttakenda, hugmyndafræði og leiðarljós MP og bera saman við önnur samfélagsmiðuð tónlistarverkefni. Þá verður kennslufræðileg nálgun MP rannsökuð og sérstaklega skoðað hvernig listræn stjórnun og ákvarðanataka fer fram. Þá verður jafnframt greint hvernig bakgrunnur þátttakenda hefur áhrif á tónlistarlega nálgun. Auk þess verður skoðað hvaða áhrif þátttaka í MP verkefnum hefur og hvort hún hefur einhver varanleg áhrif á hljómsveitarmeðlimi og þeirra líf utan við verkefnið. Í verkefninu er einnig lögð áhersla á að þjálfa tónlistarleiðtoga til rannsókna á eigin starfi, þróa rannsóknaraðferðir sem snúa að samfélagsmiðuðum tónlistarverkefnum, og tryggja fjölbreyttar miðlunarleiðir á rannsóknarmiðurstöðum þar sem rannsakendur, hag- og fagaðilar fá aðgengi að niðurstöðunum.“ 

Í rannsóknarhópnum eru, auk Þorbjargar og Önnu Hildar, Sigrún Sævarsdóttir-Griffiths, tónlistarkona, kennari við Guildhall School og stjórnandi MetamorPhonics, Lee Higgins prófessor við York St John University og stjórnandi International Centre for Community Music og Jo Gibson, rannsakandi við York St John University. Verkefnið fer fram á Íslandi og í Bretlandi. Rannsóknarafrakstri verður miðlað í gegnum fræðigreinar, heimasíðu á íslensku og ensku, heimildarmynd og röð vinnustofa, tónleika og fyrirlestra. 

Á samsettu myndinni sem fylgir fréttinni eru f.v. Sigrún Sævarsdóttir-Griffiths, Þorbjörg Daphne Hall og Anna Hildur Hildibrandsdóttir.

Til baka