Árið 2021 gert upp

Ársins 2021 verður ekki hvað síst minnst fyrir þá þverpólitísku samstöðu sem myndaðist um Keynesismann, að mati Eiríks Bergmann, prófessors við Háskólann í Bifröst. Eiríkur tók þátt í áramótauppgjöri Spegilsins, fréttaskýringarþætti Rásar 1 á RÚV í kvöld, ásamt fleiri góðum álitsgjöfum.

Með vísan í Keynesismann, hagfræðikenningar sem kenndar eru við höfund þeirra John Maynard Keynes og voru ríkjandi um og upp úr síðara stríði, á Eiríkur við COVID-aðgerðir stjórnvalda til stuðnings atvinnulífi.

Íslensk stjórnvöld hafa í þessum efnum fetað sömu eða svipaða slóð og helstu samanburðarlönd, en, eins og Eiríkur bendir á, þá er sú þverpólitíska samstaða sem myndaðist hér á landi ekki sjálfgefin. Beinar stuðningsaðgerðir sem miða að því að halda uppi atvinnustigi hafa sætt harðri gagnrýni víða erlendis.

Auk Eiríks tóku þátt í áramótauppgjörinu Svanhildur Hólm, framkvæmdastjóri Viðskiptaráðs og Halla Gunnarsdóttir, framkvæmdastjóri ASÍ. Enda þótt margt hafi borið á góma þá setti COVID19 eðlilega sterkan svip á umræðurnar.

Auk áhrifa heimsfaraldursins á atvinnulíf, efnahag og þjóðarsál voru sóttvarnaraðgerðir ræddar og sú vaxandi þörf sem er á því að þær aðgerðir verði lagaðar betur en nú er að þörfum þjóðfélagsins. Þá veltu álitsgjafar einnig upp hvað læra megi af eða sjá þakkarvert við faraldurinn.

Til baka