BA í heimspeki, hagfræði og stjórnmálafræði

Heimspeki, hagfræði og stjórnmálafræði, HHS, er nám sem hefur að markmiði að búa nemendur undir framhaldsnám og þátttöku á atvinnumarkaði jafnt innlanlands sem á alþjóðlegum vettvangi. Í því fléttast saman þrjár grunngreinar hug- og félagsvísinda sem jafnan eru kenndar hver í sínu lagi. Með því að nýta aðferðir og innsýn þessara þriggja greina saman, verður til óvenjulegt og innihaldsríkt grunnnám sem gerir nemendum mögulegt að skilja hvernig ólík sjónarhorn fræðanna geta unnið saman.

Háskólinn á Bifröst er eini háskólinn á Íslandi sem býður upp á nám í HHS. Námsbrautin er sniðin að breskri fyrirmynd og nýtur hún virðingar og vinsælda þar í landi. Námið miðar að því að veita víðtæka og fjölþætta þekkingu á gangverki nútímasamfélags auk þess að efla gagnrýna hugsun og búa einstaklinga undir krefjandi störf á vinnumarkaði og virka þátttöku í þjóðfélagsumræðu.

Umsóknarfrestur er til 15. júní  SÆKJA UM

Sérstaða að loknu námi

HHS er góður undirbúningur fyrir hvers kyns störf t.d. á vettvangi stjórnsýslu (í ráðuneytum, stofnunum og hjá sveitarfélögum), það nýtist vel við fjölmiðlastörf, kennslu og í störfum hjá mannúðarsamtökum eða við alþjóðastofnanir, svo einhver dæmi séu nefnd. Margir HHS-ingar starfa einnig hjá fyrirtækjum, stórum sem smáum, og sumir hafa stofnað eigin fyrirtæki. HHS er einnig fyrirtaks undirbúningur undir frekara háskólanám, t.d. í hagfræði, stjórnmálafræði, alþjóðasamskiptum, þróunarfræði, menningarfræði eða heimspeki og gagnast einnig vel sem grunnur fyrir stjórnunarnám (t.d. MBA eða MPA). 

Nám á Bifröst

Í Háskólanum á Bifröst er leitast við að þróa námsbrautir í samræmi við þær kröfur sem gerðar eru í atvinnulífi og samfélagi. Kennarar eru starfandi sérfræðingar á hverju sviði fyrir sig enda státar Háskólinn á Bifröst af afar sterkum tengslum við atvinnulífið. Við Háskólann á Bifröst er lögð mikil áhersla á persónulega þjónustu til nemenda, bæði af hálfu kennara og annars starfsfólks skólans.

Rík áhersla er lögð á að nemendur geti annars vegar unnið sjálfstætt og hins vegar í hópi. Jafnframt er  áhersla lögð á gagnrýna hugsun og hagnýta tengingu við úrlausn raunhæfra verkefna. Verkefnavinna er stór þáttur námsmats og vinna nemendur að verkefnum jafnt og þétt yfir hverja lotu og þannig geta nemendur tileinkað sér skilning á námsefninu jafnt og þétt. Kennarar leggja inn hljóðfyrirlestra á kennslukerfi skólans reglulega til að miðla kennsluefni til nemenda. Nemendur geta síðan nálgast fyrirlestrana og farið yfir á þeim tíma sem hentar hverjum og einum. Námið í Háskólanum á Bifröst fer fram í lotubundinni kennslu. Önninni er þannig skipt upp í tvær lotur, 7 vikur hver. Á vinnuhelgum á Bifröst fá nemendur tækifæri til að taka þátt í fjölbreyttum viðfangsefnum. Vinnuhelgar fara fram tvisvar sinnum á önn, þ.e. ein helgi á hvorri lotu. Þá gefst nemendum tækifæri til þess að hitta kennara, samnemendur, taka þátt í umræðum og hópverkefnum, sem og hlýða á gestafyrirlesara úr atvinnulífinu í námskeiðum sem það á við.

Sérstaða í kennsluháttum Háskólans á Bifröst felst meðal annars í svökölluðum misserisverkefnum. Auk þeirra verkefna sem unnin eru innan einstakra námskeiða gefst nemendum því kostur á að vinna sjálfstæð hópverkefni á þeirra kjörsviði á meðan náminu stendur. Misserisverkefnin eru kennd yfir sumarannir og eru þau viðamikil verkefni sem nemendur vinna saman sem teymi af 4-6 einstaklingum að rannsóknum og úrlausn sjálfstæðra hópverkefna sem eru síðan kynnt og lögð í dóm kennara og samnemenda. Samhliða misserisverkefnum fá nemendur markvissa þjálfun í verkefnastjórnun. Nemendur eiga að vinna tvö slík verkefni í náminu. Í misserisverkefnum er byggt á kennsluaðferð sem kallast lærdómsþróun (e. learning by developing). Þetta er kennsluaðferð sem byggir á náinni samvinnu nemenda og leiðbeinenda sem og annarra fagaðila á vinnumarkaði. Verkefnavinnan gerir miklar kröfur til nemenda en í verkefnunum er haft að leiðarljósi að þróa nýjar leiðir til að auka verðmætasköpun, samkeppnishæfi, sjálfbærni og nýsköpun. Með aðferðum lærdómsþróunar hafa nemendur stórt hlutverk sem styrkir þá og eykur hæfni þeirra til að takast á við raunverkefni þegar út á vinnumarkaðinn er komið að loknu námi. Einnig hjálpa þessi verkefni nemendum að undirbúa sig við þá vinnu sem felst í því að skrifa lokaritgerð.

Framvinda og námslok

Grunnnám er 180 ECTS og á Bifröst gefst nemendum kostur á að ljúka námi á tveimur og hálfu ári þar sem boðið er upp á nám á sumarönn. Nemendur geta því lokið 80 ECTS einingum á ári í stað 60. Með þessu móti er hægt að ljúka námskeiðum að mestu leyti á fyrstu tveimur námsárum, en á þriðja ári gera nemendur lokaverkefni auk þess að ljúka einingum sem eftir eru með starfsþjálfun eða valnámskeiðum.

Inntökuskilyrði og umsóknarfrestur

Til að geta innritast í námið þurfa nemendur að hafa lokið stúdentsprófi eða sambærilegri menntun t.d. úr háskólagátt Háskólans á Bifröst.

Umsóknarfrestur er 15. júní fyrir haustönn og 10. desember fyrir vorönn. 

Námið jók víðsýni mína og setti hlutina í stærra samhengi. Kennsla í heimspeki, þar á meðal siðfræði, er eitthvað sem allir sem starfa við stjórnmál, ættu að vera skyldugir til þess að læra.

- Sigríður Bylgja Sigurjónsdóttir,
framkvæmdastjóri Pírata, útskrifuð með BA gráðu í HHS

Námskrá

Námskrá inniheldur upplýsingar um skipulag náms, kennsluaðferðir og námskeiðslýsingar ásamt lýsingu á þeirri þekkingu, leikni og hæfni sem nemendur eiga að búa yfir að námi loknu.

Hér má finna skipulag námsins í kennsluskrá skólans.

Umsjón með námslínu: Njörður Sigurjónsson er forseti félagsvísindadeildar