Nýr doktor við félagsvísindadeild

Auður H. Ingólfsdóttir, lektor við Félagsvísindadeild, varði doktorsritgerð sína Climate Change and Security in the Arctic. Analysis of Norms and Values Shaping Climate Policy in Iceland í Háskólanum á Lapplandi þann 16. desember síðastliðinn. Um er að ræða sameiginlega doktorsgráðu frá Stjórnmálafræðideild Háskóla Íslands og Félagsvísindasviði Háskólans á Lapplandi. Þar með eru allir fastir kennarar við Félagsvísindadeild Háskólans á Bifröst með doktorsgráðu.

Rannsóknarefni Auðar voru loftslagsbreytingar og öryggismál á Norðurslóðum og voru leiðbeinendur Auðar þau Þorgerður Einarsdóttir, prófessor í kynjafræði við Stjórnmálafræðideild, og Lassi Heininen, prófessor í málefnum norðurslóða við Háskólann í Lapplandi. Andmælendur voru þau Dr. Teemu Palosaari og Dr. Annica Kronsell. Dr. Lassi Heininen stjórnaði athöfninni.

Hugtök úr femínisma og kynjafræði notuð sem greiningartæki

Auður leitar svara við eftirfarandi spurningu í doktorsrannsókn sinni;  Þrátt fyrir að loftslagsbreytingar ógni bæði náttúru og samfélögum manna hefur alþjóðasamfélagið verið svifaseint að bregðast við. Hvaða pólitísku og efnahagslegu hagsmunir og menningarlegu gildi koma í veg fyrir að við grípum til aðgerða?

Hún beitir tilviksrannsókn til að skoða áhrif loftslagsbreytinga, pólitíska orðræðu og undirliggjandi gildi þessarar orðræðu í einu ríki á Norðurslóðum, Íslandi. Rannsóknin byggist á kenningum feminískrar mótunarhyggju þar sem hugtök úr femínisma og kynjafræði eru notuð sem greiningartæki. Gögnin sem stuðst er við samanstanda af stefnumarkandi skjölum, viðtölum við fólk sem hefur beitt sér í umræðu um loftslagsmál og ræðum stjórnmálamanna.

„Tilviksrannsóknin sýnir að þrátt fyrir að fólk upplifi loftslagsbreytingar sem ógn á Íslandi þá sé ógnin óljós og fjarlæg og litlar rannsóknir eru til um samfélagsleg áhrif hennar. Eftir greiningu á stefnumótun og orðræðu um loftslagsmál á Íslandi er niðurstaðan sú að þau undirliggjandi gildi sem vísa veginn í opinberri stefnumörkun eru hvorki afgerandi karllæg né kvenlæg. Rannsóknin dregur hins vegar fram mikilvægi þess að horfa heildstætt á umræðuna í samfélaginu og setja orðræðu um loftslagsbreytingar í samhengi við ríkjandi orðræðu um öryggi og efnahagsþróun,“ segir Auður um niðurstöður rannsóknarinnar.

Auður H. Ingólfsdóttir er með BA-gráðu í alþjóðafræði við University of Washington (Seattle), próf í hagnýtri fjölmiðlun frá HÍ og MA-gráðu í alþjóðasamskiptum frá Fletcher School of Law and Diplomacy, Tufts University (Boston). Hún hefur starfað sem lektor við Háskólann á Bifröst frá árinu 2010. Áður starfaði hún m.a. sem blaðamaður (1995-1997), sérfræðingur í umhverfisráðuneytinu (2002-2003), sem sjálfstæður ráðgjafi í umhverfismálum (2003-2006, 2007) og sem sérfræðingur á vegum íslensku friðargæslunnar í Sri Lanka og á Balkansskaga (2006-2008).

Hægt er að nálgast rafræna útgáfu af ritgerðinni í opnum aðgangi hér 

Til baka