Háskólinn á Bifröst - Samþykktir háskólans á Bifröst

Tilgangur stofnunarinnar er að efla og styrkja íslenskt atvinnulíf og samfélag sem fagháskóli með því að veita framúrskarandi fræðslu. Þá skulu við háskólann fara fram rannsóknir á íslensku samfélagi, atvinnu- og viðskiptalífi er meðal annars beinist að mismunandi rekstrarformum, lýðræði í atvinnulífi og atvinnurekstri, viðskiptasiðferði og umhverfismálum. Við þjálfun og fræðslu skal háskólinn leggja sérstaka áherslu á raunhæf verkefni, tengsl við atvinnulífið, alþjóðleika, upplýsingatækni, samvinnu, hópstarf, samskipti og samskiptafræðslu, skapandi og gagnrýna hugsun. Háskólinn skal jafnframt þjálfa nemendur með tilliti til frumkvæðis, aðlögunarhæfni og sveigjanleika, vinnu, ákvarðanatöku og forystu í hópnum.

4. gr.

Stofnandi stofnunarinnar er Viðskiptaháskólinn á Bifröst sem leggur til allt stofnfé hennar.

5.gr.

Stofnfé Háskólans á Bifröst er kr. 253.369.500 í áhöldum, kennslutækjum, bókasafni, listmunum og öðrum eigum skólans sem áður voru eign Viðskiptaháskólans á Bifröst og eignarlóð skólans á Bifröst í Norðurárdal ásamt samningsbundnum réttindum. Eigi má fara með eigur skólans eða ráðstafa þeim á annan hátt en þann er samrýmist markmiðum háskólans eða stuðlar að framgangi þeirra. Stofnunin ber ábyrgð á skuldbindingum sínum með öllum eignum sínum og öðrum þeim eignum sem hún kann að eignast síðar. Engin sérréttindi í stofnuninni tilheyra stofnendum hennar.

6. gr.

Tekjur stofnunarinnar skulu vera tekjur af skólagjöldum og námskeiðahaldi. Vaxtatekjur, styrkir, gjafir, auglýsingatekjur eða önnur framlög sem stofnuninni kunna að berast.

7.gr.

Í háskólastjórn sitja fimm menn. Samtök atvinnulífsins skipa þrjá, hollvinasamtök háskólans skipa einn og háskólaráð Háskólans á Bifröst skipar einn. Á sama hátt skal skipa hverjum stjórnarmanni varamann. Tveimur árum eftir skipun hvers stjórnarmanns fyrir sig fyrir lok ágústmánaðar það ár sem kjörið er skulu formaður háskólastjórnar og rektor fara fram á það við þann aðila sem í hlut á að skipað verði á ný og tekur ný stjórn við í septembermánuði. Við skipun skal þess gætt að meirihluti aðalmanna og varamanna sé hvorki í námi né föstum störfum við Háskólann á Bifröst. Undirskriftir meirihluta stjórnar skuldbinda stofnunina.

8. gr.

Háskólastjórn hefur yfirumsjón og eftirlit með öllum málefnum, eignum og rekstri háskólans í samráði við rektor. Hún ræður rektor til starfa og ákvarðar um starf hans og önnur stjórnunarstörf við skólann. Hún skipar dómnefndir vegna kennararáðninga og vegna framgangs kennara. Hún afgreiðir rekstraráætlun og ársreikning skólans og lætur gera ráðstafanir til að tryggja nauðsynlegt rekstrarfé. Háskólastjórn ræður löggiltan endurskoðanda fyrir skólann. Formaður boðar til funda og er fundur lögmætur ef boðum hefur verið komið til allra sem tök eru á með 5 daga fyrirvara og meirihluti situr fundinn. Rektor situr háskólastjórnarfundi með málfrelsi og tillögurétti, svo og aðrir þeir sem háskólastjórn ákveður.

9. gr.

Háskólastjórn ræður rektor. Rektor fer með stjórn allrar starfsemi og málefna háskólans í umboði háskólastjórnar. Rektor kemur fram fyrir hönd skólans gagnvart starfsmönnum og nemendum og út á við. Hann skiptir verkum með starfsmönnum og stýrir störfum þeirra. Í samráði við háskólaráð ábyrgist rektor að öll starfsemi háskólans sé í samræmi við samþykktir og reglugerð.

Samkvæmt nánari ákvæðum í reglugerð skal háskólaráð ákvarða um vísindaleg málefni, fræðslu, námskröfur og rannsóknir, starfshætti og samskipti í stofnuninni. Nánar er kveðið á um skipan og starfsemi háskólaráðs í reglugerð háskólans.

10. gr.

Rektor fer með stjórn fjármála skólans í umboði stjórnar. Óheimilt er að standa að útgjöldum eða skuldbindingum um fram heimild háskólastjórnar. Reikningsár skólans er 1. ágúst til 31. júlí. Rektor skal fyrir 15. maí ár hvert leggja rekstraráætlun næsta reikningsárs fyrir háskólastjórn til afgreiðslu.

11. gr.

Starfsmenn og nemendur háskólans skulu rækja störf sín af alúð, þegnskap og skyldurækni. Þeim er öllum skylt að gæta starfstrúnaðar, taka þátt í að framfylgja reglum skólans og gæta eigna hans og öryggis. Hverju starfi skal gera starfslýsingu. Allt starf skólans skal miða að þroska, velferð og velgengni sérhvers nemanda.

12. gr.

Reglur um störf við Háskólann á Bifröst, um starfsgengi, starfsframa og starfsheiti kennara og um starfsskyldur þeirra skulu samrýmast því sem tíðkast við íslenskar háskólastofnanir og sérkennum og sérstöðu háskólans. Með reglugerð skal nánara ákvarða um þessi atriði, svo og um starfshætti og stjórnun, fræðsluskipan, inntökuskilyrði, námsvísi og námsmat, deildaskiptingu og aðrar starfsreglur.

14. gr.

Háskólastjórn getur með samhljóða samþykkt breytt samþykktum þessum enda sé fundur lögmætur og tillaga um slíkt hafi verið kynnt sérstaklega í fundarboði. Verði Háskólinn á Bifröst lagður niður skal eigum hans ráðstafað með tilliti til markmiða hans.

15. gr.

Hagnaði sem verður af starfsemi stofnunarinnar skal varið til þeirra verkefna er greinir í 3. gr. samþykkta þessara. Þó er stjórn hennar heimilt að leggja sanngjarna fjárhæð til hliðar til að tryggja fjárhagsstöðu og áframhaldandi rekstur stofnunarinnar. Hugsanlegt tap af starfsemi stofnunarinnar verður greitt úr sjóðum hennar eða fært á næsta reikningsár.

16. gr.

Þar sem ákvæði samþykkta þessara ná ekki til um hvernig með skuli farið, skal hlíta ákvæðum laga um sjálfseignarstofnanir sem stunda atvinnurekstur nr. 33/1999, svo og öðrum lagaákvæðum er við geta átt.

Þannig samþykkt á fundi stjórnar þann 31. ágúst 2006. Sjöundu grein var breytt 10. október 2008.