17. nóvember 2009

Tækifærin í íslensku atvinnulífi - hvar liggja þau? Hádegisverðafundur í Iðnó

Háskólinn á Bifröst gengst fyrir hádegisfundi í Iðnó fimmtudaginn 19. nóvember frá kl. 12 til 13.30 þar sem leitast verður við að greina þau tækifæri sem kunna að felast í íslensku atvinnulífi um þessar mundir.

Þrátt fyrir margvíslega erfiðleika í íslensku efnahagslífi hafa mörg fyrirtæki náð eftirtektarverðum árangri að undanförnu. Alþjóðleg frumkvöðlaverðlaun Cartier féllu í ár í skaut íslensku fyrirtæki, Auði Capital, og CCP leitar eftir á annað hundrað manns til starfa hjá fyrirtækinu. Hvað veldur því að sum fyrirtæki blómstra í kreppunni þrátt fyrir vonlausar ytri aðstæður? Er kreppan tækifæri fyrir menntunar- og menningargeirann eða frumkvöðlastarf? Á fundinum verður fjallað um þær áskoranir sem íslenskt samfélag; fyrirtæki, menningarlíf og menntastofnanir standa frammi fyrir í efnahagskreppunni.

Ávörp á fundinum flytja þau Hilmar Veigar Pétursson, forstjóri CCP, Guðbjörg Edda Eggertsdóttir, aðstoðarforstjóri Actavis, Ágúst Einarsson, rektor Háskólans á Bifröst og Hörður Arnarson, forstjóri Landsvirkjunar. Fundarstjóri verður Bryndís Hlöðversdóttir aðstoðarrektor sem einnig flytur ávarp.

Að loknum erindum verða umræður með þátttöku framsögumanna á pallborði.  Léttur hádegisverður. Aðgangseyrir 1.200 kr. greiðist við innganginn.

Hægt verður að horfa á beina útsending hér.