Í meistaranámi í Evrópufræðum við Háskólann á Bifröst er nálgun stjórnmálafræði, sagnfræði, hagfræði og lögfræði fléttað saman í eina þverfaglega heild.
Markmið
Með aðildinni að Evrópska efnahagssvæðinu (EES) varð Ísland virkur þátttakandi í Evrópusamvinnunni sem núorðið snertir flest svið samfélagsins. Í meistaraámi í Evrópufræðum á Bifröst læra nemendur að þræða sig eftir flóknum vef Evrópusamstarfsins og eiga að námi loknu að þekkja stefnumál og innviði Evrópusambandsins og skilja með hvaða hætti Ísland tengist samstarfi Evrópuríkja og hvaða tækifæri og möguleikar felast í fjölþjóðasamstarfi. Nemendur öðlast færni í að greina efnahagslega, félagslega, menningarlega og stjórnmálalega þætti samrunaþróunarinnar í Evrópu í þverfaglegu samhengi.
Námsferð og erlent samstarf
Í Evrópufræðinni á Bifröst er lögð áhersla á að nemendur kynnist með beinum hætti margvíslegum hliðum evrópsks samstarfs. Á meðal þess sem boðið er upp á er árleg námsferð til Brussel þar sem nemendur heimsækja meðal annars sendiráð Íslands, stofnanir EFTA, ESB og NATO. Þá geta nemendur tekið hluta af námi sínu við erlenda háskóla og stofnanir sem Evrópufræðasetrið á í samstarfi við.
Uppbygging námsins
Sumarlota I (staðnám, júlí – ágúst)
Inngangur að Evrópufræði
Efnahagssamruni Evrópu
Evrópumenning
Haustönn (fjarnám og vinnuhelgar, september - desember)
Ísland í evrópsku samstarfi (námsferð til Brussel)
Aðferðafræði
Valfag
Vorönn (fjarnám og vinnuhelgar, janúar—maí)
Evrópusaga
Utanríkisstefna ESB
Valfag
Sumarlota II (staðnám, júlí - ágúst)
Evrópuréttur
Svæðisbundið samstarf í Evrópu
Valfag
Haust II (fjarnám undir handleiðslu kennara)
Skiptinám erlendis (Valkvætt)
Meistararitgerð
Evrópufræðasetur
Evrópufræðasetur hefur verið starfrækt á Bifröst frá árinu 2005 og er það faglegur bakhjarl meistaranámsins. Markmið setursins er að vera vettvangur fyrir rannsóknir og alhliða faglega umræðu fræðimanna og fagaðila á Íslandi um Evrópumál með sérstaka áherslu á málefni sem snerta atvinnulífið. Setrið er starfrækt í nánum tengslum við samtök atvinnulífs og launþega og á í samstarfi við fjölmarga aðila sem sinna evrópsku samstarfi; svo sem stofanir EFTA og ESB og erlenda háskóla og fræðasetur.
Forstöðumaður Evrópufræðaseturs er Eiríkur Bergmann Einarsson, dósent við félagsvísindadeild.
Sjá nánar á vef Evrópufræðaseturs Háskólans á Bifröst
Viðurkenningar
Bifröst er fyrsti háskólinn á Íslandi til að bjóða upp á meistaranám í Evrópufræðum, fyrst sem sérlínu innan hagnýtra hagvísinda árið 2003 og síðar sem fullbúið meistaranám í Evrópufræðum frá árinu 2006. Evrópufræðin á Bifröst hafa hlotið sérstaka viðurkenningu og fjárstyrk frá Evrópusambandinu úr virtum sjóði þess sem kenndur er við Jean Monnet sem var einn helsti hugmyndafræðingur Evrópusamrunans eftir lok síðari heimstyrjaldar. Aðeins þær námsstofnanir sem standa í fremstu röð í Evrópufræðum hljóta slíka viðurkenningu.
Þá er Evrópufræðasetrið á Bifröst eini íslenski þátttakandinn í samstarfsneti Evrópufræði í álfunni sem rekið er ef SENT-netverkinu sem einnig nýtur stuðnings framkvæmdastjórnar ESB.
Starfssvið Evrópufræðinga
Síaukinn fjöldi starfa hefur alþjóðlegan snertiflöt og í atvinnulífi er nú gerð aukin krafa um þekkingu á alþjóðamálum og færni í fjölþjóðastarfi. Meðal hugsanlegra starfssviða eftir nám í Evrópufræðum má nefna störf á borð við; utanríkisþjónustu; Evrópusamstarf ráðuneyta, sveitafélaga og stofnana; störf við alþjóðlegar stofnanir, svo sem EFTA, ESB, NATO og SÞ; evrópskt og alþjóðlegt samstarf á vegum samtaka atvinnulífs og launþega; margvísleg fjölmiðlastörf; alþjóðastörf við háskóla og aðrar menntastofnanir og alþjóðleg tengslastörf í rannsóknar-, mennta- og menningarmálum.
Nánari upplýsingar um MA nám í Evrópufræðum má finna hjá félagsvísindadeild og Evrópufræðasetri Háskólans á Bifröst.