Mentor hlýtur vaxtarsprotann 2009

Vaxtarsprotinn er viðurkenning fyrir öfluga uppbyggingu sprotafyrirtækis sem veitt er á vegum Samtaka iðnaðarins, Rannsóknamiðstöðvar Íslands og Háskólans í Reykjavík. Tilgangurinn með veitingu hans er að vekja athygli á góðum árangri sprotafyrirtækja í örum vexti og skapa þannig aukinn áhuga og skilning á uppbyggingarstarfi þessara fyrirtækja.  Upplýsingakerfið Mentor.is er þróað á Íslandi en fyrirtækið starfar einnig í Svíþjóð undir nafninu InfoMentor P.O.D.B og í Englandi. Á næstu vikum munu skólar í  Sviss bætast í hóp notenda, enda eru mikil tækifæri að opnast á markaði í Evrópu.

Tækifæri Mentors á erlendum markaði byggir á sterkri stöðu íslenska skólakerfisins. Íslenskir skólar eru mjög framarlega er kemur að tölvuvæðingu og tölvunotkun auk þess sem netnotkun foreldra er með því mesta sem þekkist í heiminum. Íslenskir skólastjórnendur og kennarar eru kröfuharðir notendur sem gera miklar kröfur til Mentors varðandi hönnun, einfaldleika og notagildi. Afrakstur þróunar fyrir íslenska skóla skilar Mentor.is kerfinu meðal fremstu kerfa í Evrópu er kemur að upplýsingakerfum fyrir skóla.