11. mars 2009

Reynir Kristinsson hættir sem deildarforseti VD og Ásta Dís Óladóttir tekur við

Samkomulag hefur orðið að Reynir Kristinsson láti af störfum sem forseti viðskiptadeildar Háskólans á Bifröst. Hann mun áfram kenna við deildina og sinna öðrum verkefnum a.m.k. fyrst um sinn. Háskólinn á Bifröst færir Reyni kærar þakkir fyrir góð störf á undanförnum árum en hann var ráðinn að skólanum haustið 2006.

Ásta Dís Óladóttir hefur verið ráðin deildarforseti viðskiptadeildar. Hún er dósent við skólann og lýkur doktorsprófi frá Copenhagen Business School í Danmörku á þessu ári. Ásta Dís er fyrst kvenna til að gegna starfi forseta viðskiptadeildar við háskóla hérlendis.