22. ágúst 2007

Fjölmargir gistikennarar á sumarönn meistaranáms

Fjölmargir gistikennarar, erlendir og innlendir, hafa annast kennslu í meistaranáminu á sumarönn. Nýverið héldu af landi brott þeir dr. Enrique Jaen,  og dr. Eric Stubbs en þeir fræddu meistaranema í alþjóðlegri bankastarfsemi og fjármálum, um eignastýringu og einkabankaþjónustu.

Enrique Jaen er fjárfestingarráðgjafi í einkabankaþjónustu fjárfestingarbankans Bear Stearns í New York. Hann starfar fyrst og fremst við að útbúa ýmiskonar stærðfræði- og tölfræðileg líkön sem geta nýst viðskiptavinum bankans í að taka stefnumiðaðar fjárfestingarákvarðanir, finna hagstæðustu eigna- og skuldasamsetningu og fylgjast með áhættu eignasafna sinna . Auk þess aðstoðar hann við stjórnun eignasafna sem samanstanda af kauphallarvísitölusjóðum (ETFs).

Dr. Eric Stubbs starfar sem sérfræðingur og framkvæmdastjóri í eignastýringu fjárfestingabankans Bear Stearns.  Eric er með meira en 20 ára reynslu úr bankaheiminum, sérstaklega á sviði eigna- og áhættustýringar.  Samhliða bankastörfum hefur hann verið virkur í akademískum störfum bæði sem kennari við Harvard University, Rutgers University og University of Toronto,  auk þess sem hann er höfundur 3ja bóka á sínu fræðasviði og hefur skrifað og birt fjöldann allan af fræðigreinum á sviði fjárfestinga og áhættustýringar.

Þá kenndi dr. Francis Gupta eigindlegar rannsóknaraðferðir í fjármálum á meistarastigi.

Francis hóf störf hjá Dow Jones Indexes árið 2003 og starfar í dag sem framkvæmdastjóri og yfirumsjónarmaður rannsókna og áhættustýringar.