15. ágúst 2007

Kvikmyndahátíð á sunnudag

Sýningar verða í Hriflu

Sunnudaginn 19. ágúst verður  kvikmyndahátíð í Háskólanum á Bifröst. Hátíðin er á vegum félagsvísindadeildar og haldin í tengslum við námskeið í kvikmyndafræði sem Björn Norðfjörð kennir nú við skólann. 

Myndirnar sem sýndar verða voru hluti af dagskrá kvikmyndahátíðar í Skjaldborgarbíói á Patreksfirði um hvítasunnuna. Um er að ræða íslenskar heimildamyndir sem uppfylla þurftu þrjú skilyrði til þess að komast á Skjaldborgarhátíðina; þ.e. að vera íslenskar, ekki leiknar og helst ekki hafa kostað meira en 350 milljónir. Á Skjaldborgarhátíðinni voru sýndar 27 myndir á tveimur dögum en úrval þeirra verður sýnt á Bifröst.

Sýningar á Bifröst verða í Hriflu. Þær hefjast klukkan 16.00 sunnudaginn 19. ágúst og standa fram eftir kvöldi. Dagskrá hátíðarinnar verður nánar kynnt á föstudag.

Aðgangur er ókeypis og öllum heimill.