15. nóvember 2010

Jólagjöfin í ár er lopapeysa

Á hverju ári gefur Rannsóknarsetur verslunarinnar út spá um jólaverslunina og af sama tilefni velur hópur valinkunnra neyslufrömuða jólagjöf ársins.

Þær forsendur sem hafðar voru að leiðarljósi við val á jólagjöfinni í ár voru þessar:

• Vara sem er vinsæl meðal neytenda
• Ný vara eða hefur vakið endurnýjaðan áhuga
• Vara sem selst vel
• Vara sem fellur vel að tíðarandanum

 Eins og venjulega barst fjöldinn allur af hugmyndum að jólagjöf ársins.  Að lokum fór þó svo að dómnefndin valdi íslenska lopapeysu sem jólagjöfina í ár.

Samkvæmt Rannsóknarsetri verslunarinnar verður jólaverslunin svipuð að magni til og fyrir síðustu jól. Veltan verður samt 4% meiri í krónum talið vegna verðhækkana sem orðið hafa frá síðasta ári. Jafnframt kemur fram að áætluð heildarvelta smásöluverslunar í nóvember og desember verði um 60 milljarðar króna og að hver landsmaður verji að meðaltali 39.500 kr vegna árstímans.